Afgeronde rechthoek: Start-
paĝo

 

OSIEK-konferenco pri Sciencfikcio (SF) kaj robotoj

 

“Sciencfikcio kaj Robotoj” estis la temo de la OSIEK-konferenco en Svitavy (Ĉeĥio), 14-20 julio 2012, kun 53 partoprenantoj kaj prelegantoj el 6 landoj.

 

Petro Chrdle komencis la programon per prelego pri la fratoj Čapek, kiuj ĉ.1920 enmondigis la vorton “robot”.

Krome, kiel bonega surloka organizanto, Chrdle aranĝis ke loka Esperanto-grupo faris brilan prezentadon de la tiama teatraĵo R.U.R. (“ROSSUM-aj Universalaj Robotoj”) de Karl Čapek.

 

El Rusio venis Mikaelo Bronŝtejn, kun SF-ekspertizo nutrita de tradukado de 8 verkoj de la fratoj Strugatzki, pri kiuj aŭtoroj li ankaŭ eksplikis la cenzurajn komplikaĵojn kiujn ili alfrontis en la tempo de la Sovet-Unio.

 

Miguel Gutiérrez (Liven Dek) el Hispanio verve rakontis kiel en 1982 li lanĉis la libro-serion ‘SFEROJ’ (SF-eroj), kiu aperis du jardekojn kaj vere alkondukis SF-on en Esperantion. En sia dua prelego, li libere kaj inspirige filozofadis pri (bio-) robotoj, kolektiva subkonscio, noosfero...

 

István Nemere, la tre konata Esperanto-verkisto el Hungario, kiu verkis ankaŭ du SF-librojn, lerte laŭtpensadis pri kielmaniere ni, homoj, estas ligitaj kun la kosmo, pri ‘transpermia’ (meteoroj transportantaj la vivon), pri ciklika universo aŭ eĉ ekzisto de pluraj...

 

Mélanie Maradan, svisa tradukisto-terminologo, raportis pri la nuntempa projekto ALPAZORO, kiu celas al limigita aro (kelkmil) da Esperantaj frazoj, per kiuj handikapuloj aŭ maljunuloj enhejme povos sukcese alparoli modernan zorgroboton.

 

El Pollando, William Russ kaj Anna Skutlarska surprizis nin kun prezentado de la 2-hora pola SF-filmo ‘Seksmisja’ (1984), kiun ili estis bonege subtekstigintaj en Esperanto (‘Seksmisio’).

 

Toon Witkam, kiu antaŭ du jaroj proponis la konferenc-temon kaj helpis trovi kaj inviti la prelegantojn, mem faris du prelegojn:

- Vizio pri nia ideala planedo pri la libro Terra de Nemere kaj

- Robotoj en 2045, pli inteligentaj ol ni?